कैलाशमा ९९ घरधुरीलाई सुधारिएको धुँवा रहीत चुलो वितरण

हेटौंडा– कैलाश गाउँपालिकाका वडा नम्बर ३, ४ र ७ नं. मा बसोबास गर्ने ९९ घरधुरीलाई सुधारिएको धुँवा रहीत चुलो वितरण गरिएको छ । सोमबार एक कार्यक्रमका बीच गाउँपालिकाका अध्यक्ष लोक बहादुर मुक्तानले चुलो हस्तान्तरण गरेका हुन् । गाउँपालिकामा स्वास्थ्य र शिक्षा क्षेत्रमा काम गर्दै आइरहेको सांग्रिला डेभलपमेन्ट एशोसिएसनले तीन वटा वडामा घरधुरी सर्वेक्षण गरेर छनौटमा परेका ९९ घरलाई चुलो प्रदान गरेको हो ।

 कार्यक्रममा बोल्दै अध्यक्ष मुक्तानले सुधारिएको चुलो वातावरण र स्वास्थ्यमैत्री रहने बताए । घरमा भएका साना बालबालिका र जेष्ठ नागरिक आमाबाहरुको स्वास्थ्यलाई धुँवाले प्रतिकुल असर पारिरहेको अवस्थामा यी चुलोहरुले स्वास्थ्यमा सहयोग पुग्ने बताए । ‘घरमा लगेर 

नराख्नुस्, लगेपछि प्रयोग पनि गर्नुस् । ’ अध्यक्ष मुक्तानले भने । स्वास्थ्य र शिक्षामा सांग्रिलाले धेरै नै लगानी गर्दै आइरहेको गाउँपालिकाका उपाध्यक्ष बालकुमार मल्लले बताए । आफ्नो मर्म र भावनालाई आत्मसात् गर्दै जून किसिमको काम गरिरहनु भएको छ, त्यसमा गाउँपालिकाले साथ सहयोग प्रदान गर्ने बताए । उनले चुलो प्रयोग गरेर सक्दो फाइदा लिन स्थानीयलाई आग्रह समेत गरे ।

 सांग्रिला डेभलपमेन्ट एशोसिएसनका कार्यक्रम संयोजक मधुसदन राउतको अध्यक्षतामा भएको कार्यक्रममा वडा नम्बर ३ का वडाध्यक्ष देवलाल बल, वडा नम्बर ४ का वडा सदस्य नमराज चेपाङ, कटुञ्जे स्वास्थ्य चौकीका प्रमुख आशाकुमारी गुरुङ लगायतको आतिथ्यता रहेको थियो । स्वास्थ्य परियोजना अन्तरगत सुधारिएको धुँवा रहित चुलो वितरण गरिएको कार्यक्रम संयोजक राउतले बताए । ‘हामीले घरधुरी सर्वे गर्यौ, प्रतिवेदन केन्द्रीय कार्यालयमा पठाएपछि प्राथमिकतामा परेर छनौट भएका ९९ घरधुरीलाई चुलो वितरण गरेका हौं ।

 ’राउतले भने । उनले लाभग्राहीलाई चुलो राम्रोसँग प्रयोग गर्न आग्रह गर्नुका साथै चुलोबाट फाइदा हुनाले सक्दो उपयोग गर्नु आग्रह गरेका छन् । चुलो उपयोगले दाउराको कम प्रयोग हुनुका साथै विभिन्न 

रोगबाट बच्न सकिने बताए । गाउँपालिकासँगको समन्वयमा एशोसिएसनले विभिन्न स्वास्थ्य र शिक्षाका क्षेत्रमा कामहरु गर्दै आइरहेको छ ।