हेटौंडा — मकवानपुरको राक्सिराङ गाउँपालिकाले कोदोको रक्सि, गाँजाबारे बहस र अनुसन्धान गर्ने, पत्रु खाना (जंक फुड) को बिक्री वितरणमा नियन्त्रण गर्ने नीति लिएको छ । गाउँपालिकाका अध्यक्ष राजकुमार मल्लले आगामी आर्थिक वर्षका लागि प्रस्तुत गरेको नीति तथा कार्यक्रममा रैथाने खाद्य वस्तुको उत्पादन र प्रयोगमा जोड दिँदै पत्रु खानालाई क्रमशः नियन्त्रण गरी अन्ततः प्रतिबन्ध लगाउने उल्लेख छ ।

मंगलबार प्रस्तुत भई गाउँ सभाबाट पारित उक्त नीति तथा कार्यक्रममा ‘एक टोल एक उत्पादन’ को लक्ष्य पनि लिइएको छ ।

गाउँपालिकाले अब गाँजाको वैधानिक प्रयोगसम्बन्धी बहस र अनुसन्धानलाई अगाडि बढाउने, र नीति निर्माण तहको ध्यानाकर्षण गराउने योजना सार्वजनिक गरेको छ । दुर्गम तथा विकट भौगोलिक अवस्थाका कारण हल गोरु पाल्ने कृषकलाई प्रोत्साहन रकम दिने नीति लिइएको छ ।

गाउँपालिकाका ५ वर्ष मुनिका बालबालिका र आमाको स्वास्थ्य सुधारका लागि पोषण कार्यक्रम र बाल स्वप्न परियोजना सञ्चालन गरिने जनाइएको छ । पालिकामा कुपोषित बालबालिकाको संख्या झन्डै २ सयको हाराहारीमा रहेको छ । चेपाङ बहुल राक्सिराङ गाउँपालिकाका उपाध्यक्ष वनस्तम थिङले आगामी आर्थिक वर्ष २०८२/०८३ का लागि ६३ करोड ५२ लाख ३१ हजार २ सय ८९ रुपैयाँको अनुमानित बजेट प्रस्तुत गरेका छन्, जुन चालु आर्थिक वर्षको तुलनामा करिब ९ करोड रुपैयाँ बढी हो ।

यस्तो छ बजेटको विवरण

संघीय सरकारबाट

वित्तीय समानीकरण अनुदान : १० करोड २५ लाख

सर्तसहितको अनुदान : २० करोड ६१ लाख

विशेष अनुदान : १ करोड ७५ लाख

समपूरक अनुदान : ६८ लाख

राजस्व बाँडफाँट : १० करोड ६० लाख ७८ हजार ४७२

जम्मा : ४३ करोड ८९ लाख ७८ हजार ४७२ रुपैयाँ

वाग्मती प्रदेश सरकारबाट

वित्तीय समानीकरण अनुदान : ९६ लाख ११ हजार

राजस्व बाँडफाँट : ३ करोड ८४ लाख ९८ हजार ८१७

सर्तसहितको अनुदान : १ करोड ८८ लाख १३ हजार

विशेष अनुदान : ६० लाख

समपूरक अनुदान : ३ करोड २९ लाख

जम्मा : १० करोड ५८ लाख २२ हजार ८१७ रुपैयाँ

आन्तरिक आम्दानी : ९ करोड २१ लाख रुपैयाँ

खर्च विवरण :

चालु खर्च : ४८ करोड ५३ लाख ५४ हजार १५५ (कुल बजेटको ७६.४१ प्रतिशत)

पुँजीगत खर्च : १४ करोड ९८ लाख ७७ हजार १५४ (कुल बजेटको २३.५९ प्रतिशत)

स्रोत; कान्तिपुर