स्काईलर च्यानले चन्द्रमामा होटल खोल्ने, कोठाको अग्रिम बुकिङ 

२१ वर्षीय अमेरिकी युवा स्काइलर च्यानले स्थापना गरेको ‘जीआरयू स्पेस’ नामक स्टार्टअप कम्पनीले सन् २०३२ सम्म चन्द्रमामा संसारकै पहिलो होटल सञ्चालन गर्ने महत्वाकांक्षी योजना सार्वजनिक गरेको छ। अन्तरिक्ष पर्यटनलाई नयाँ उचाइमा पुर्‍याउने लक्ष्यसहित कम्पनीले चन्द्रमामै होटल निर्माण गरी पर्यटकलाई बसोबासको सुविधा दिने तयारी थालेको हो। यस योजनाअन्तर्गत कम्पनीले अन्तरिक्षप्रेमीहरूका लागि होटलका कोठाहरूको अग्रिम बुकिङसमेत खुला गरिसकेको छ।

जीआरयू स्पेसका अनुसार चन्द्र होटलका कोठाको अन्तिम मूल्य अझै तय भइनसके पनि एक कोठाको लागत एक करोड अमेरिकी डलरभन्दा बढी पर्न सक्ने अनुमान गरिएको छ। यद्यपि अग्रिम बुकिङका लागि सम्पूर्ण रकम तिर्नु नपर्ने र उपलब्ध सुविधाअनुसार २ लाख ५० हजारदेखि १० लाख डलरसम्म डिपोजिट लिइरहेको कम्पनीले जनाएको छ। कम्पनीले यस होटललाई अन्तरिक्ष पर्यटनको इतिहासमै नयाँ अध्यायका रूपमा प्रस्तुत गर्ने दाबी गरेको छ।

यस परियोजनालाई अन्य चन्द्र होटल योजनाभन्दा फरक बनाउने मुख्य पक्ष यसको निर्माण प्रविधि हो। पृथ्वीबाट भारी निर्माण सामग्री र उपकरण चन्द्रमामा लैजानुको सट्टा जीआरयू स्पेसले रोबोटिक प्रविधिको प्रयोग गर्ने योजना बनाएको छ। यी रोबोटहरूले चन्द्रमाको माटो प्रयोग गरेर बलिया र टिकाउ ब्लक तयार गर्नेछन्, जसबाट चन्द्रमाको कठोर वातावरण सहन सक्ने संरचना निर्माण गरिनेछ। यस प्रविधिले लागत घटाउनुका साथै दीर्घकालीन रूपमा चन्द्रमामा संरचना निर्माणका लागि नयाँ सम्भावना खोल्ने विश्वास गरिएको छ।

कम्पनीका अनुसार नियामक निकायबाट आवश्यक स्वीकृति प्राप्त भएमा सन् २०२९ बाट चन्द्र होटल निर्माणको काम सुरु गरिनेछ। सबै काम योजनाअनुसार अघि बढेमा सन् २०३२ सम्म होटल सञ्चालनमा ल्याउने लक्ष्य राखिएको छ। स्काइलर च्यानले यो परियोजनालाई केवल व्यवसायिक पहल मात्र नभई मानव सभ्यतालाई अन्तरिक्षतर्फ विस्तार गर्ने ऐतिहासिक कदमका रूपमा लिएको बताएका छन्।