राक्सिराङ । मकवानपुरको राक्सिराङ गाउँपालिका वडा नम्बर ४ का बासिन्दाले अब बिरामी पर्दा एम्बुलेन्स भाडा तिर्नु नपर्ने भएको छ। वडाध्यक्ष संजय कोइरालाले वडावासीका लागि एम्बुलेन्स सेवा पूर्ण रूपमा निःशुल्क गर्ने घोषणा गर्नुभएको हो ।

सोमबार घोरकोटे स्वास्थ्य इकाइको उद्घाटन समारोहलाई सम्बोधन गर्दै वडाध्यक्ष कोइरालाले बिरामीलाई अस्पतालसम्म पुर्‍याउँदा लाग्ने एम्बुलेन्सको खर्च आफूले व्यक्तिगत रूपमा व्यहोर्ने प्रतिबद्धता जनाउनुभयो।

 निःशुल्क सेवा: वडाका बिरामीलाई उपचारका लागि हेटौंडा वा भरतपुरका अस्पताल लैजानुपर्दा अब एम्बुलेन्स भाडा लाग्ने छैन । व्यक्तिगत खर्च: एम्बुलेन्सको इन्धन र अन्य भाडा खर्च वडाध्यक्ष कोइरालाले आफ्नै निजी स्रोतबाट उपलब्ध गराउनेछन् । उद्देश्य: आर्थिक अभावका कारण कोही पनि नागरिक उपचारबाट वंचित हुन नपरोस् र एम्बुलेन्स नपाएर छटपटिनु पर्ने अवस्थाको अन्त्य होस् भन्ने लक्ष्य राखिएको छ।

• गाउँपालिकासँग समन्वय: यो सेवा गाउँपालिकासँगको आवश्यक सहकार्यमा सञ्चालनमा ल्याइएको हो।

"अब हाम्रो वडामा एम्बुलेन्स नपाएर वा भाडा तिर्न नसकेर उपचारबाट वञ्चित हुनुपर्ने अवस्था रहने छैन। नागरिकको स्वास्थ्य नै हाम्रो पहिलो प्राथमिकता हो।"

— संजय कोइराला, वडाध्यक्ष

स्वास्थ्य इकाइ र जग्गा दान

घोरकोटेमा नयाँ स्वास्थ्य इकाइ सञ्चालनमा आएसँगै स्थानीयलाई सामान्य उपचारका लागि टाढा धाउनुपर्ने बाध्यता हटेको छ। हाल यो इकाइ भाडाको घरबाट सञ्चालन भइरहेको भए पनि चाँडै आफ्नै सुविधासम्पन्न भवनमा सर्ने तयारीमा छ।

विशेष कुरा त के छ भने, उक्त स्वास्थ्य इकाइको स्थायी भवन निर्माणका लागि वडाध्यक्ष कोइरालाका बुवाले सडक छेउको करिब १ रोपनी जग्गा दान गर्नुभएको छ। सोही जग्गामा अहिले धमाधम भवन निर्माणको काम भइरहेको छ।

स्वास्थ्य सेवा र भौतिक पूर्वाधारमा वडाध्यक्ष र उनको परिवारले देखाएको यो सक्रियताको स्थानीय स्तरमा उच्च प्रशंसा भइरहेको छ।